लगातार चट्याङ, असिना–वर्षाले बारामा क्षति

वीरगंज, २८ चैत । करैयामाई गाउँपालिका–८ नरहीदेखि ईटहर जाने सडकमा पर्ने अविनाश कुशवाहाको मकै खेतमा राति ३ः०० बजे चट्याङ खस्दा कृषि मिटर, मोटर, टहरा लगायत कृषि सामग्री जलेर नष्ट भएको छ ।
त्यसैगरी बारागढी गाउँपालिका–४, सुखी टोलस्थित विश्वकर्मा पोल्ट्री फर्ममा चट्याङ खस्दा भीषण आगलागी हुँदा लाखौंको क्षति भएको छ। आगलागीमा फर्मको संरचना, सामग्री र कुखुराहरू जलेर पूर्ण रूपमा नष्ट भएको पोल्ट्री फर्मका सञ्चालक हरेन्द्र विश्वकर्माले बताए ।
गएराति २ बजेदेखि वर्षा–असिना र चट्याङ लगातार पर्दा पर्साको अधिकांश क्षेत्रमा विद्युत आपूर्ति ठप्प भएको थियो । लगातार चट्याङ पर्दा प्रशासनले किसान तथा बासिन्दाहरूलाई सतर्कता अपनाउन आग्रह गरेको छ।